Бүгінде еліміз бойынша ұлттық спорт түрінің қай саласы болса да мықтап дамып келеді. Оған астаналық «Жігер» спорт клубының спортшылары да барынша өз үлестерін қосуда. Соның бір дәлелі ретінде, 27-29 мамыр күндері Шығыс Қазақстан облысының Тарбағатай ауданында өткен асық атудан Ырғызбай Досханаұлы атындағы Халықаралық Турнирдегі жігіттердің үлкен жетістігін айтуға болады.

«Жігер» спорт клубының жаттықтырушылары Марат Исламбеков пен Ескендір Рахметовтер ойын тәсілдерін жетік меңгерген сайысқа сақадай сай жігіттерін алып барды. Алғашқы күннен ойынға қызу кіріскен құрамында Әділхан Жұмағұлов, Нұрқанат Молжігітов пен Мырзамұрат Қайыпбеков ойнаған «Астана» командасы жақсы нәтижеге қол жеткізді. Алдарына үлкен үміт қойған жастар жігерлерін жонып, күн емес, сағат сайын салмақты нәтиже көрсете бастады. Әділқазылардың көзіне түскен бұл топ ойын өрнектерін көрсете отырып, аз уақыттың ішінде-ақ топ жарды. Сөйтіп, жарыс қорытындысында олар жүлделі бірінші орынға ие болды. Ал, «Жігер» командасы құрамында Есен Жұмағұлов  және Исламбеков Марат пен Рахметов Ескендір екінші орынды иеленді. Осылайша топ басынын көрінген жігерліктер жігер танытып, командалық есепте бірінші және екіншіорындарды иеленді.

  Осылайша, «Жігерге» жігер қосқан жігіттер аталмыш турнирдің жеңімпаздары мен жүлдегерлері атанып, чемпиондық тұғырдан көрінді.